CRÓNICA “ MONGOLIA SUNRISE TO SUNSET 100KM”

39 hores 30 minutos. Non, nun ye’l tiempu que me llevo terminar esti Ultra Trail. Eses 39 hores 30 minutos ye lo que me llevo llegar dende la mio casa fasta el llugar de la carrera, y eso foi muncho más duro que la carrera mesma. Pero pagó la pena, y ye que viaxar a Mongolia ye como volver p’atrás nel tiempu. Esta tierra permanez cuasi igual a como yera fae cientos d’años. La so escasa población, rural y nómada na so mayoría, malpenes modificó estos paisaxe. Y esto pue comprobase a vista d’avión, pero tamién nel últimu trayeutu en furgones per unes pistes de tierra rotes pel pasáu duru iviernu. Tol cansanciu acumuláu nun quita pa que podamos esfrutar d’esti espectáculu natural.

Llegamos al campamentu Toilogt, al pie del llagu Hovsgol que tamién-y da nome al Parque Nacional. Esti llagu que s’asemeya a un mar, ta a 1645 metros d’altitú, arrodiáu de viesques de pinos y montañes. Son mas de les 10 de la nueche cuando aportamos, xusto pa ver atapecer cola boca abierta. El campamentu ta compuestu por unes cuantes gers ( la vivienda típica mongola) y delles construiciones más de madera. Tres repartimos los gers onde durmiremos de tres en tres toca cenar, anquen un podremos duchamos fasta mañana porque les duches piesllen a les 10, mala suerte.

Los tres díes siguientes d’aclimatación pónenmos al día del sitiu tan especial nel que tamos y pel que correremos. Hai tiempu pa facer l´últimu entrenu y conocer la primer parte de la carrera que fadremos de nueche. Pero tamién pa desconeutar del mundiu ensin móvil nin interné y simplemente perdese per la oriella d’esti llagu o peles sos viesques. Tiempu pa conocer la vida nómada d’esta xente nuna ruta a caballu, pa montar en canoa o dar una vuelta en bici.

Anque’l día enantes de la carrera toca descansar, preparar la mochila, pasar el reconocimiento mélicu y dir a la charra informativa de la carrera. A estes altures la gastroenteritis ta faciendo estragos nel campamentu, y Jean-Paul, compañeru de ger, ye unu d’ellos. Ta mui, mui mal, vomitando y tremando de fríu. Cruzo los deos pa que nun me pase a min.

Y llega’l día. Son les dos y suenen los despertadores. En dos hores saldremos anque yo podría quedame na cama otres 10 hores. Polo menos. Almuerzo la mio comida nel ger y voi vistiéndome, fuera ta mui frio, malpenes 4 graos. Media hora enantes de la salida tiro pal comedor, onde mos xuntamos toos y toes y pasamos el control de material. Caliento un poco baxo techu y a menos cinco tiro pa la pancarta de salida.

Nun hai tiempu pa más, tres dos unu y vamooos… Los corredores mongoles salen como si fueren los 100 metros llisos, y yo, muncho más tranquilu anque encabezando a los occidentales. Nel primer tramu atravesamos la primer viesca de pinos onde van cayendo los primeros corredores llocales. Tres salir a una pista de tierra hai dalgunes reutes llarguísimes, y paezme raro que nun vea al primer corredor, anquen un quiero pensar mal, pue ser que nun lleve la lluz prendía.  Nesti tramu garro a los que van en tercer y segunda posición, y anque los noto mui afogaos, intente seguime’l ritmu cueste lo que cueste. Y non solo eso, un d’ellos pégase a min metíendome el coldu como si toviéremos corriendo en pista. En vista lo visto decido aprovechar y dexar que me marque’l ritmu ya que voi rápido pero cómodu. Llegamos al primer avituallamientu, tamos nel quilómetru 12 y entama la primer xubida. Y nel primer metru d’ella el mio acompañante tien que parar arreventáu. Yo sigo solu nesta nueche zarrada. Per delantre más de cinco quilómetros d’ascensu fasta Chichee Pass, a 2.300 metros. La xubida ye mui constante, pero cuando salimos de la proteición de los pinos la temperatura baxa otros cuantos graos, y les mios manes nótenlo. Paezme raro que siga ensin ver la lluz del primeru, y ye que coles zetes que facemos sedría fácil velu, pero nun quiero pensar mal nin cuando veo una moto na metá del ascensu. Toi ya mui arriba cuando entamo a psar pelos famosos h.itos de piedra típicos d’estes tierres. La organización ya nos avisara que nun se puen tocar les piedres porque son sagraes y trae mala suerte facelo, y tamien que les tenemos que dexar a un lláu, pero yo agora nun m’alcuerdo si yera a izquierdes o dreches, asina que yo paso a la so drecha, a ver si hai suerte.

Al poco oigo como s’avera una moto y para poco dempués d’adelantame anquen un me diz nada. Yo paro xunto a él y al enfocalu veo a un paisanín que polo menos debió de ser soldáu del exércitu de Chinggis Khaan. Como sigue ensin dicime nada entrugo si voi bien y entos entama a faceme señes que non, que teo que tirar p’abaxo. Yo nun doi creitu, paez mentira que siempres me tea que perder, y menos lo doi cuando veo al paisanín tirase cola moto monti a travies recortando les zetes.

–          Güelitu, cagon too, nun vas que te vas matar ho?, nun ves que ya nun yes un chaval y que la to moto nun ye de trial.

Pero nada, güelitu sigue a lo suyo ente les piedres, los sucos y una pendiente de la de mio ma. Y mentantu doi la vuelta veo que nun soi l’únicu que me pasé de llargo, los dos mongoles que veníen tres de min tamién se pasaron, asina qu’agora vuelvo llevalos delantre. Tando ya nel bon camín toca un cresteu y nesi momento entama a riscar. Pena de nun poder parar porque lo que veo ye una pasada. Dende ellí arriba el roxu del cielu reflexa nel llagu y déxame cola boca abierta.

Al poco d’entamar el descensu hai otros dos mongoles a caballu que mos indiquen un desvíu, menos mal porque nun veo marca denguna. Esti descensu nun ye fácil, descendemos per un camín abandonáu cola vexetación mui alta y muncha piedra suelta ente ella que nun se pue ver. Nesti tramu vuelvo a dexar atrás a los dos corredores mongoles, y cola claridá del día pueo ver la ropa y los playeros colos que tan corriendo. Fasta unu d’ellos lleva una llinterna de mano porque nun tien frontal. Asina y too cuerren muncho más que la mayoría d’occidentales que vienen per detrás con playeros de 150€.

Siguiendo les marques de pintura verde nos pinos, sí, sí, marques de pintura verde nos árboles, aporto al fondu del valle d’un ríu qu’agora ta secu y al poco toi nel segundu avituallamientu del quilómetru 23. Malpenes paro a picar dalgo porque entovía teo bebida na mochila, asina que tres cuuzar otru ríu secu y moyame enforma los pies al pasar una fastera de llamuerga entamo la xubida a Khirvesteg Pass, y esta ye la parte más guapa de tola carrera. Ascendemos ensin camín al travies d’una viesca pinos pela cara norte de la montaña. Too ta enlleno musgu, árboles y suelu, y tal paez que pisamos un colchón. Equí ye imposible perdese, polo que podemos esfrutar de lo que tamos viendo, anque yo voi apuráu porque nun-yos saco muncho a los mios perseguidores.

Tres facer cume tírome p’abaxo per unos praos mui pindios de yerba peralta. En llegando al valle hai dos mozos mongoles nun avituallamientu d’agua. Anque entovía me queda isotónicu pído-yos que m’enllenen un de los bidones que llevo. Pero al ver lo que me van dar mándolos parar. Y ye que destapen unbidón grande d’agua que ya se ve que ta puerco, y cuando unu d’ellos garra un poco d’ello con un caz upa dame vence fasta tropezones flotando y virus de la gastroenteritis saludándome colos brazos abiertos.

–          Ná dexáilo. Prefiero morrer de sede qu’envelenáu.

Sigo descenciendo camín del llagu fasta que vuelvo perder les marques, pero como veo al fondu la pista qu’arrodia al llagu tiro p’allá ensin moléstame muncho. Agora namás que queda dar la vuelta a un llagu secundariu pa volver al campamentu. Esto ye la meta pa los que namás que cuerren maratón, y tamién pa los que compitiendo na de 100 deciden quedase equí. Cosa rara. Entro segundu a más de 30 minutos del primeru, asina que va tar difícil garralu.

Equí ta l’avituallamientu más importante de la carrera, y ye un de los dos onde podemos dexar una bolsa nuestra. Namás llegar pido la mia, pero ellí nun hai denguna bolsa. Resultes que nun s’alcordaron llevales dende’l comedor, asina que darréu pidila salen a la carrera una docena mongoles camín d’elles. Yo descálzome porque voi camudar de calcetos al dir tou moyáu. Y mentantu lleguen voi comer y beber dalgo, anque lo de beber imposible porque del biden qu’equí tienen resultes que namás que saquen agua caliente. Y cuando digo caliente nun quiero dicir del tiempu, quiero dicir caliente como pa facer fervichos con ella. Van llegando coles bolses, pero denguna ye la mio, y al veles veo que son les del otru avituallamientu. Dígolo y nueves carreres pal comedor. Yo aspero de brazos cruciaos ensin dear creitu. Lleguen con más mochiles que me van enseñando pero denguna ye la mia, fasta que pal tercer viaxe apaez. Echo vaselina, pongo los calcetos secos, relleno bebida y tiro. Ensin comentarios…

Y nel tramu más fácil de carrera, per una pista ancha y llana del too tropiezo con una piedruca y métome un bombazu de la de dios. Caigo de frente y clavo el bote la mochila nel costillar. De lo malo nun rompió nin el bote nin les costielles.

Nel siguiente desvíu vuelven a tener xente a caballu, y menos mal porque yo siguia de frente. Y un guah.e a caballu acompáñame un bon cachu mentantu cruzo una nueva viesca, asina que nun teo qu’andar atopando marques. Y cuala ye la mio sorpresa cuando’l rapaz proponme que monte con él. Dígo-y que non, pero nun quiero pensar mal de nadie…

Dempués d’un cachu déxame solu, y dempués d’otru cachu toi perdíu del too. Equí les marques tan cada muncho tiempu, y llego a un puntu onde nun veo más. Cágonme en tolo humano y lo divino, tiro p’atrás y p’alantre pero nada, nun veo marca denguna. Vuelvo cagame en too y decido tirar pal este ya que pa ehí ye onde ta’l llagu y el siguiente avituallamientu. Teo que cruciar pente un grupu de gers, asina que busco a dalguien pa entrugar el camín. Pero al primer paisanu que veo nun-y pueo entrugar nada, ta a lo suyo agacháu al pie d’un pinu, y ye que nos gers nun hai baños. Dempués atopo a una muyer que m’indica, pero sigo ensin ver marques. Otra vegada pal este y col mapa na mano falo con un paisanín, llama al so nietu y dícenme que toi mui cerca l’avituallamientu. Y ye verdá a 500 metros atópolu y cuénto-yos la mio aventura. Tamos nel quilómetru 55 y como rellené col mio isotónicu nun necesito repostar. Pico dalgo y danme les indicaciones pa siguir. Pero cola tensión y el mio probe ingles nun m’entero de muncho y en nun atopando más marque verdes teo que da-yos unes voces. Manden a dos guah.es en moto que me ponen nel bon camín. Toca xubir el Jankhai Pass, siempres caminando porque a estes altures nun tamos como pa correr p’arriba. Y nel altu un críu dizme per onde siguir al veme un poco despistáu, y ye que pa un daltónicu como yo ye complicáo atopar marques verdes nun paisaxe que ye verde cuando yo nun veo’l verde. Y nun ye broma.

Descensu mui llevaderu y a mui bon ritmu. Como avisé que me perdí, resultes qu’avisaron al siguiente avituallamientu y un paisanu y bien a buscame en moto con una de les voluntaries de la carrera, Pascale, qu’amás ye la mio intérprete. En llegando al avituallamientu del quilómetru 65 pido agua frio, pero solo l’hai caliente, nun sé a qué bien esto. La solución qu’atopo ye que Pascale dame agua d’una botella que tien y perres que-y pido pa mercar nel siguiente chigre o tienda qu’atope.

Y arrancando que nun sé cuánto saco al terceru. Sigo per un terrenu mui corrible a bon ritmu, pero nun atopo onde mercar nada fresco, asina que nel avituallamientu del 76 un me queda otra que recargar con agua caliente. El siguiente tramu ye mui guapu pero mui duru. Corremos pela costa del llagu metíos nuna viesca pinos. El terrenu ye onduláu del too, xubimos y baxamos a costa d’estrozar les patuques, P’arriba camino y p’abaxo troto mentantu teo que parar munches vegaes pa ver onde ta la siguiente marca. Faéseme interminable esti tramu, pero a la fin dexo tres de min los pinos y aporto al avituallamientu caberu, a 12 quilómetros de meta. Más agua caliente y ya namás que queda siguir la costa fasta meta nun terrenu corrible del too. Y equí sí, equí atopo una tienduca de carretera y faigo una buena inversión nuna cola bien fría. Bufff que placer!!. Y con ánimos renovaos sigo restando metros fasta que a falta de cuatro quílometros danme unos calambres que nun me dexen correr. Tres parar un cachu pa baxar el xemelgu, nun pueo más que andar como un marchador, cualesquier intentu de correr amenaza con más problemes musculares.

Toi estresadísimu, si pierdo’l pódium a ta poco de meta ye pa morise. Ando tolo rápido que pueo con un güeyu p’alantre y otru p’atrás. Fae tiempo que pueo ver el campamentu de meta al fondu, y eso fae más grande la presión. Pasu ente pasu voi averándome a meta, saco la bandera d’Asturies y consigo trotar los 200 metros finales.

Y entro segundu, contentu, mui contentu de volver a un pódium tres años dempués anque seya nuna carrera ensin muncho nivel. Polo menos ves que paga la pena tolo sufrio en tantos meses d’entrenos, y compensa a eses carreres nes que les coses nun salen bien, o a eses maldites lesiones. Eso sí, muscularmente toi destrozáu, polo que la visita a les agues xelaes del llagu ye obligatoria.

Al día siguiente toca la entrega de premios y la cena oficial. Y por desgracia pa los que nun solemos tar muncho nel pódium nun hai trofeos pa los y les primeres. Namás que la camiseta de finalista y el diploma acreditativu. Bono, pero’l trofeu llévolu yo dientru.

Y vuelta a la capital, Ulaam Baatar, pa conocer el caos d’esta ciudá y ver lo que tovía queda de lo que tuvo que ser una ciudá monumental.

Y vuelta pa casa y a pasar otres 39 hores d’aeropuertos, aviones y autobuses. Pero l’aventura y la experiencia fueron inolvidables.

Dende la tierra de Chinggis Khaan, Puxa Asturies!!, próxima etapa, América del Sur en abril. Ultrafiord en Patagonia chilena.

IMG_3992 IMG_3967 IMG_4115 IMG_4050 IMG_4031CRONICASIMG_4027

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s