INCA TRAIL MARATHON

INCA TRAIL MARATHON
Dempués d’un llargu viaxe cola tensión de perder una conesión pol retrasu nun de los vuelos, aterrizo en Cusco, antigua capital del imperiu Inca. Tamos a 3300 metros y, de momentu, llevo bien la altitú. Nel hotel recibimientu con un te de coca, que dicen que ye bono pal mal del altura pero qu’a min nun me convence pol so sabor. Momentu de dir conociendo al pequeñu grupu de corredores y a los organizadores del eventu, y dase cuenta de lo particular de esti maratón. Per un lláu les restriciones qu’hai na entrada al Camín Inca fae qu’esti seya una carrera mui minoritaria, con un ambiente mui familiar, y per otru, ye una carrera orientada sobre too al mundu anglofonu, con corredores de Nueva Zelanda, Australia, Sudráfica, Inglaterra y USA.
Los tres díes enantes de la carrera, la organización prepara una aclimatación con entrenos que pasen de los 3700 metros, y que faen, sobre too nel primetu, que’l pulsu se dispare cuando’l terrenu se pon pindiu. Ye’l momentu de dir tanteando a la xente, de dir viendo quién pue tar alantre y quien pue dir de tapáu. El perfil de la mayoría de los que competirán , ye’l de corredores d’asfaltu con poca o denguna esperiencia en montaña, asina que, anque los hai con mui bonos tiempos en maratón, eso dame ventaxa.
Estos díes sirven tamién pa ver como la calidá de los hoteles y restaurantes ye superior a la d’otres carreres d’esti tipu, y ye que la organización ta siendo de 10, cuidando tolos detalles y poniendo especial enfotu en que mos empapemos de la cultura Inca con un montón de visites y desplicaciones.
El día enantes de la carrera toca facer la aprosimación al que será el campamentu base de la salida. Vamos en bus per una malísima carretera de tierra fasta’l fin d’ésta. Esti ye’l puntu pol que la mayoría turistes entren al Parque Nacional pa facer el Inca Trail, camín que-yos llevará tres o cuatro díes con nueches en campamentos autorizaos. Pa nós la entrada sedrá unos miles de metros más allá, y una vegada pasáu’l control tovía toca siguir caleyando fasta les ruines de Llactapata, enfrente les cuales tan montaes les nueses tiendes. Sitiu espectacular, ente montañes espectaculares metíes ente la borrina y coles ruines inques enfrente. El campamentu ta montáu al detalle y nun mos falta de nada. Ponse a llover, pero eso nun impide que se faiga el ritual del sortéu ente los porteadores de la carrera de tola ropa y material escolar que los participantes trayemos. Tres una cena de restaurante con estrella Michelín, toca dir pa la tienda, mañana la salida sedrá a les 6:00 y hai que descansar. Sigue lloviendo.
Suena’l despertador, son les 2:45, almuerzo y vuelvo pal sacu fasta les 4:00, que ye cuando’l restu’l campamentu se pon en marcha. Cola lluz de la frontal faigo los preparativos finales mentantu los demás almuercen na carpa comedor. Ta acabante parar de llover y la humedá ye grande. A les 5:30 toca ponese en marcha, 15 minutos de caminata nocturna llevaramos al puntu onde entama la carrera, la suerte ta echada. Les normes del parque impiden cualesquier montaxe na salida o meta, asina como marcar el recorríu, polo qu’una raya fecha con un palu ye la llinia de salida. Queden pocos minutos, y unu de los neozelandeses entretienos esos segundos con una espectacular jaka.
Cuenta p’atras cuando aclaria’l día, tres, dos, unu… salimos. Sé por Devy, l’organizador, que los primeros pocos quilómetros son corribles anque piquen p’arriba, y que si quiero facer un bon tiempu teo qu’apretar ehí. Y eso faigo, marco’l ritmu dende la salida y quédome solu. Y solu llego al final del terrén corrible, d’equí p’alantre, cientos y cientos d’escalones de piedra fasta’l primer altu. La subida ye interminable, y los escalones son desesperantes. Hailos que deben medir ente 40 y 50 centímetros, y la pendiente que salven dalgunos tramos ye brutal. Asina y too voi bien, voi primeru y les pulsaciones nun se disparen como fae unos díes mentantu gano altura dende los poco más de 2500 metros de la salida.
Nesti primer tramu paso por tres de los campamentos que sirven a los turistes pa facer nueche. Tan acabantes de llevantase na mayoría casos, y nun dan creitu cuando me ven y los sos guíes-yos despliquen en inglés que toi corriendo un maratón. Cuando falten 5 minutos pa les dos hores, la primer tortura paez que fina. Veo’l panel que tantes vegaes viera en semeyes d’otres ediciones y que marca el pasu de Warmiwañuscca (pasu de la Muyer Muerta), colos sos 4215 metros.
– Como pa que nun morriera la probe muyer cola xatá tan grande que ye llegar fasta equí, lo raro ye nun morriera un cachu enantes.
Lo que se ve dende’l colláu ye indescriptible, solo por esta vista yá pago la pena’l viaxe. Delantre de min vese praúticamente tol descensu, y nin un solu turista, toi solu dafechu y nun m’aguanto a nun dar un glayíu que tuvo qu’oyise fasta en Macchu Picchu. Ensin parar de correr garro aire, por dicir dalgo, y p’abaxo.
Espero poder disfrutar del descensu, pero namás entamar veo que ye muncho pior que pel otru lláu, los malditos escalones son más altos, más estrechos y amás tan moyaos, polo que’l tramu ye mui teúnicu y hai que tener muncho procuru pa nun cayer. Y por suerte nun caigo y llego abaxo onde ta el segundu avituallamientu. Recargo agua y segunda subida de duros escalones, anque polo menos esta muncho más curtia que la primera. Dende equi ye vezu atopase con porteadores y turistes a los que voi avisando pa que s’aparten, sin problema colos primeros, y con dalgunu colos segundos que paez que-yos cuesta apartase mediu metru pa que yo pase.
– A ver home, que ye que tais sordos o nunca vistes a naide corriendo pel monte.
Segundu altu, ruines de Runkuraqay, 3800 metros. Sigo solu anque nun quiero char una güeyada p’atras pa ver si me sigue dalguien. Otru descensu peligrosu ente escalones cuando, mierda, siento pasos, garráronme. Pero non, resultes que con dos porteadores que toi acabante de pasar y que s’animen a correr comigu una parte del descensu, eso sí, con 30 quilos nel llombu y unes chancles como calzaú. Increyible, anque los mando pasar nun quieren, dicen que namás que me quieren animar, y home, animar nun sé si m’animen muncho, pero la presión fae que garre más riesgos y apriete un poco más.
Tercera subida fasta les ruines de Sayacmarca a 3580 metros, más turistes atontaos, más escalones y nel descensu otros porteadores que tamién me siguen. y ente unos y otros faen que nun baxe’l ritmu, y ye que cuando te tan viendo paez que siempres das más, anque lo pagues cuando ya nun te ven y ties que garrar un poco aire.
Última subida, Phuyupatamarca 3640 metros. Agora sí que me veo campeón y entamos disfrutar, desciendo mui fuerte y llevo un correr reondu, nin dolores musculares, nin articulares, nin problemes estomacales, que pena que nun fuera siempres asina. Paisaxe preciosu, con montañes selvátiques que descienden na vertical fasta los valles.
Nun debe quedar muncho pal últimu avituallamientu, pero pasen los minutos y nun lu atopo. Quedo ensin na pa beber, y ye que los porteadores nun llegaron a tiempu. Fallu gordu pa la organización. Anque lo pior taría por vese. Dempués de tener qu’entrugar nun cruce onde tampoco ta un control, aporto a lo que ye la entrada oficial a Machu Picchu, a unos 6 quilómetros de la meta. La organización avisó que tendríemos que dar los nuesos datos y que ellos tendríen un llistáu colos nuesos nomes. Pero cuando llego a la puerta d’entrada esa puerta ta pesllada del too. Momentu de tensión tremendu. Menos mal qu’hai un paisanín sentáu nun de los bancos y puedo, anque fale pal cuellu la camisa, que nun toi perdíu, qu’esa ye la entrada pa Machu Picchu, y que el guardia salió y peslló la puerta. Los cagamentos nun ye que los oyeran en meta, ye que los oyeron fasta nel Vaticanu.
– Cagon …., cagon mi …. ….., cagon la …. que lo …..
Y esta xente que ye tan cristiana flipaba, nun oyeron cosa igual na vida. Intento pasar per un lláu pero hai allambre d’espinu, asina que como me diz el paisanín teo que dar media vuelta y dir a una casa del ministeriu a avisar. Toi atacáu, y agora sí, col pulsu a mil subo les escaleres fasta, a la segunda, llegar a un edificiu oficial onde tras desplicar la que me pasa baxen comigo a la carrera p’abrime, eso si, dempués de da-yos los mios datos. Si me lleguen a garrar equí dame mal, pero nun me garren y tiro nos 6 quilómetros finales.
Esti sustu fae que nun los disfrute como me prestaría, y amás teo muncha sed, asina que nun me queda otra que mendigar agua a una turista yanqui qu’atopa con una botella. Por suerte’l mio probe inglés convéncela y dame agua.
– Thanks, very thanks my friend.
Yá veo “Inti Punku”, la Puerta del Sol que da acesu a la ciudad sagrada de Machu Picchu, pero primero, como non, un montón d’escalones cuasi vericales que teo que subir a cuatro pates, y agora sí, ya veo la ciudá perdía, poco más de mil metros y meta. Vista gloriosa, espectacular. Toi seguru que denguna carrera nel mundu tien una meta tan guapísima como ésta.
Cuando gané nel Himalaya nun pensaba en volver ganar otra carrera, con una vegada na vida yá me conformaba, pero la vida dame otru golpe de suerte y vuelvo disfrutar d’esa sensación inigualable que ye sentise campeón, anque seya nuna carrera de 3ª división como ésta. Últimos metros, últimos escalones, veo al miembru la organización que marca la meta, llevanto los brazos, voi ganar, voi ganar, siiiiiiiiií. Una conquista personal nuna ciudá inca qu’enxamás foi conquistada.
Y amás de la victoria consigo batir el record de la prueba nos sos 18 años d’esistencia, dexándolu en 4:56:37, pero teniendo los pies en suelu, y sabiendo que munchos de vosotros podríeis facelo en muncho menos.
Sentimientu de felicidá que nun me pudieron quitar nin el batallón de mosquitos que me taben esperando en meta p’agradecémelo con más de 40 picaures nes dos piernes, nin la oportuna gastroenteritis que pillé al día siguiente y qu’entovía arrastro.
Dende la ciudá perdía de Machu Picchu, Puxa Asturies!!

Etapa Final, L’Antártida, marzu del 2013.

El pase de diapositivas requiere JavaScript.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s