CRONICA MARATHON DES SABLES

             

 

Marathon Des Sables 2012

7 díes. 6 etapes. 250 quilómetros. Sahara marroquí. Autosuficiencia. Datos y númberos que nun tendríen qu’estrañar a naide nunos años como éstos onde paez ser que tan de moda les carreres de montaña o aventura ca vegada mas llargues y dures. Sicasí, ye l’autosuficiencia lo que marcará la dureza d’esta aventura, y márcalo muncho antes de ponese na llinia de salida, y ye que son munchos los meses que cualesquier participante de Sables tien que dedicar a informase y atopar tol material necesariu pa, polo menos, intentar salir nes meyores condiciones posibles. Y esto supón pasase unes cuantes hores delantre l’ordenador lleendo y comparando una montonera de datos y posibilidaes, anque nun hai nada como poder falar con dalguien que yá corriera notres ediciones y te ponga al día de lo que te vas a atopar.

05/04/2012
A la fin entama l’aventura. Cola mochila enllena d’ilusión garramos el primer vuelu que mos llevará d’Asturies a Madrid, llugar d’encuentru de tolos participantes que venimos de Llatinoamérica, Portugal y de tol Estáu Español. Mentantu se fae tiempu, ye curiso ver como van apaeciendo pela terminal persones col mesmu modelu de mochila con ventral y bidones incluyío, y tamién con una tira velcru cosía nos playeros. Ta claro quién va pa Sables. Tres les primeres presentaciones yá se van faciendo los primeros grupos, y nel mio casu ta claro que Carlos, un vascu que repite aventura, sedrá estos díes el mio compañeru de sofrimientos.
Tres un primer vuelu a Casablanca, un segundu déxamos yá en Ouarzazate, cientru d’operaciones de la organización. Yá ye tarde cuando aportamos al hotel, asina que cena y pa la cama, que tantu viaxe cansa más que la mesma carrera.

06/04/ 2012
Darréu del almuerzu un bus vien a recoyenos al hotel pa llevamos primero al puntu d’encuentru col restu participantes, tovía nel mesmu Ouarzazate. Equí ye cuando ún se decata de les dimensiones d’esta carrera. Decenes y decenes de 4×4 de la organización, camiones de los usaos en ediciones del Dakar, camiones militares marroquís, cientos de persones, hasta 300, cola ropa de la organización, y una filera interminable de buses que mos llevarán al primer campamentu.
Per delantre quédamos un duru treslláu de unes 4 hores de bus, con parada pa xintar lo que mos dan nuna bolsa. Tamién mos apurren el llibru ruta, y ye que’l percorríu ye secretu fasta güei. Asina que toos mos tiramos a estudialu anque a munchos mos cueste un bon amoriu.
El bus para en Aït saadane, la carretera muerre equí, asina que tenemos que montar nos camiones militares que mos lleven como el ganáu coles mochiles y la xente amontonao fasta el campamentu. Na metada de dungún sitiu llevántase esta miniciudá que se dixebra en dos, per un lláu la parte de la organización, y per otru la de les h.aimes onde taremos los y les corredores. Éstes asítiense en dos círculos concéntricos d’unos 1000 metros de perímetru. A min tócame la h.aima 44, nel círculu interior. Y anque les h.aimes son pa 8 persones, en ésta taremos namás que 7, el mio collaciu Carlos, Pedro y Miguel, vecinos de Madrí y tamién repetidores nesta esperiencia, Carlos de Sa, el gran corredor de montaña portugues, y la pareya, portuguesa tamién, de Susana y Telmo. Colocamos les nueses coses na colcha que fae de suelu y comprobamos que la única proteición que mos dará la h.aima sedrá la del sol, ya que al tar abierta per dos llaos tamos cuasi a la intemperie.
Tres garrar una botella d’agua y cenar na carpa-comedor de la organización toca pasar la primera nueche nos sacos. Equí ye’l sol el que pon los horarios, asina que temprano pa la cama.

07/04/2012

A les 6 yá ye de día, asina que tola xente entama la actividad. A les 6:30 tenemos que garrar otros 4’5 llitos d’agua que mos da la organización. El repartu l’agua faese dende un camión que ponen na metada de los círculos de h.aimes. Y esta mañana l’espectaculu al garrar les botelles ye una culiebra, dicen qu’una víbora, que mataron esta nueche y que ta como troféu na metada la esplanada. Mal entamu pa dalguien que como yo tien fobia a estos bichos, anque muncha xente gárrala y saquense semeyes con ella, qu’ascu!!.
Almuerzu na carpa a les 7:30 y mañana llibre pa conocer el campamentu, ya que los controles de mochiles van per orden de dorsales y a nos nun mos toca fasta les 14:30, asina que cuandu lu pasamos yá mos dieron la xinta del día, que la verdá ye que ta mui bona, y eso que tienen que cocinar pa unes 1300 persones.

Sables

Toca facer definitivamente la mochila con tolo necesario pa los prósimos 7 díes y averase con too a la carpa de verificaciones. Lo primero ye entregar la maleta que mos mandarán al hotel d’Ouarzazate, darréu danmos los dorsales, el 892 pa min, la bengala y la cincha col chip que tendremos que llevat nel todiellu. Dempués pasamos a la verificación en si, nun revisen toles mochiles, anque lo que tol mundiu tien quéntregar ye una declaración d’honestidá onde se declara tolo que llevamos na mochila, tanto’l material obligatoru como’l voluntariu y en cualesquier momentu un control pue revisate y sancionate si dalgo falta. Tamién s’especifica la xinta que se lleva y la cantidá de calories, unes 18.000 nel mio casu. Entréguenmos la tarxeta de control d’agua que tendremos que llevar y que mos marcarán en cada control de pasu. Y pa finar pasamos a los mélicos, a los que s’entrega’l certificáu, l’ellectru, y que te dan una bolsa con 100 pastielles de sal y la tarxeta sanitaria que tamién tendremos que llevar siempres.
Al salir peso la mochila con tolo que tan acabame de deme. 9 quilos xustos, asina que si sumamos otru quilu y mediu d’agua, mañana saldré con 10’5 quilos nel llombu.
A les 5 ye la charra oficial, dende’l techu un 4×4, Patric, el cabezaleru de too esto, y una intérprete van desplicando en francés y en inglés cómo furrulará la carrera. Tamién faen la presentación de los campeones del añu pasáu, y como tolos díes pondrán el cumpeaños feliz a los que tan d’aniversariu. De lo más interesante de la charra ye la desplicación de cómofurrulen los servicios. Son unes cabines feches con toldo onde hai un water güecu, la organización date unes bolses biodegradables que tienes que poner nel water y dempues tirar nunos cubos grandes que tan fuera y que recueyen ca poco pa tiralo too a una fosa. Ye un métodu que tol mundiu aplaude, ya que ye mui hixénicu y evita situaciones d’ediciones anteriores onde polo visto la redolada del campamento asemeyábase a un campu mines y los golores facíense insoportables.
A les 7 última cena que mos da la organización, hai que recargar los depósitos tolo que se pueda, y ye que al finar esa cena entama la verdadera autosuficiencia.
Mañana entamamos, nótase la tensión na xente y tamién les ganes por salir. L’aspera d’estos diés fízose llarga. Pal sacu, hai que descansar.

08/04/2012 AMM0UGUER – OUED EL AATCHANA 34 km
A les 5:30 entama l’actividá. Yo soi de los más madrugadores, y anque güei nun saldremos fasta les 9:00 prefiero nun andar con priesa. La rutina de les mañanes sedrá siempres la mesma. Tres una visita al bañu y almorzar, sobre les 6:00 los “h.aimeros” entamen a desmontar el campamentu, colo que tenemos que sacar toles nueses coses fuera pa finar de vestinos , calzamos, echamos crema solar, preparar la mochila… y tolos díes ente 6:30 y 7:30 tenemos que recoyer la botella d’agua que mos dan.
A les 8:00 tenemos que tar toos na salida, ya que toca sacar la semeya dende l’helicopteru mentantu formamos el númberu 27, que ye les esdiciones que se lleven feches. Ente el sol que ya calienta y el pesu la mochila el rital faese eternu, ya que darréu toca otra charra de la organización dende la llinia de salida.
Tres los saludos d’ánimu aporta la hora. Per megafonía suena “Camín del ifiernu” d’AC/DC, que sedrá la banda sonora de la carrera. Emoción, muncha emoción, los pulsometros tienen que tar chando fumo. Cuenta p’atras y yá, entama esta super aventura, vamos camín del ifiernu.
Salgo a bon ritmu, pero al poco veo que’l pesu la mochila va facese muncho más duro que nos entrenos, a los 3 quílometros tocamos por primer vegada les dunes y teo que baxar el ritmu, muscularmente cárgome muncho y nun voi finu. Fae muncho calor, la mochila pesa como un muertu, les dunes y bancos de sable atásquenme, esta primer etapa ta siendo más dura de lo que pensaba. Paso el primer control, recargo agua que vien col mio númberu y cuya botella teo que tirar nun de los sacos, ya que ye motivu de penalización si la tires pel recorríu.El segundu tramu ye más montañeru y con superficie más dura, pero sigo ensin dir bien. Paso el segundu control y al poco tenemos que pasar una de les montañes más altes de tola carrera. Entamo a dir meyor y tanto nel ascensu como nel descensu soi quien a recuperar unes cuantes posiciones, pero na llarga recta de más de 3 quilómetros vuelvo desfondar, y entro en meta tocáu.
Na meta garramos otres tres botelles d’agua y tiramos pa la h.aima, un trayeutu que se fae eternu. Toi colapsau muscularmente, asina que toca espurrir un bon cachu enantes de xintar la dieta lliofilizada. A l’altura los reñones teo una pequeña rozaura fecha pola mochila, asina que toca dir al puestu  de primeros ausilios. Hai muncha xente curándose, y anque a la mayoría-yos dan les vendes, gases y l’antisépticu pa qu’ellos mesmos se curen, yo teo suerte y véndenme.
A la fin entraría el 78 de la xeneral, que nun ye lo que queria pero la carrera ponte nel to sitiu. Falando colos compañeros de h.aima toos comparten que la etapa foi mui dura pa ser la primera. Carlos y Pedro tan mal del estómadu, y Pedro gomita dientro la h.aima.
La tarde, como’l restu de tardes, pasa descansando, y ye que val más nun gastar munches enerxíes. Lo meyor ye que teo los pies bien, y ye que ya se ve muncha xente coxa pel campamentu.
Cena temprana y pal sacu con un cielu enllenu estrelles y una lluna inmensa enriba nós.

09/04/2012 OUED EL AATCHANA – TAOURIRT MOUCHANNE 38’5 Km
Otra mañana la mesma rutina. pa min lo más importante ye llimpiar bien los pies enantes de poner los calcetos y colocar les polaines pa que nun entre nada dientru del playeru. Dende güei les salides sedrán a les 8:30, pero hai que tar primera na salida pa escuchar la charra informativa. Vuelve sonar AC/DC y entamamos.
Consigo dir dalgo meyor qu’ayeri, pero nes dunes fúndome y vuelvo tar cargadísimu. Pasando el segundu control entama el cruce d’un llagu secu, una interminable recta de 10 quilómetros na que se puen ver espeyismos al fondu. Y pa finar otros 10.000 metros con dunes y sable que faen un aliviu entrar en meta. Remonto fasta el 58 de la xeneral, pero les sensaciones siguen sin ser bones.
Al entrar na h.aima yá tan descansando Carlos de Sa y Telmo, los dos portugueses que van mui bien na xeneral. Namás veme Telmo dizme que teo la camiseta enllena sangre per detrás, asina que poniéndome no pior tiro pa la enfermería. La cola ye inmensa, y cuando me atienden dícenme que los mios compañeros tendrán que quitame la venda que llevo y curame delles vegaes fasta mañana cuando me tendrán que vendar con otra venda que me dan. Nun atopo munchos voluntarios pa quitame la venda, y a la fin sedrá Telmo quien s’atreva, y Carlos el vascu quien me vaya curando a lo llargo’l día. Tanto él como Pedro siguen mal del estómadu, y lo que yá ye dalgo xeneralizao son les angüeñes, yo teo 6, pero denguna en sitios molestos, asina que nun me quexo viendo los pies d’otra xente. Eso sí, dende agora toquen les cures periódiques de los pies.
La tarde ye mui desagradable, muncho viento que fae incómodo tar na h.aima. Tol mundiu intenta apañase pa pesllar un de los frontales, pero los resultaos nun son siempre bonos. Les condiciones tan siendo dures, tolos veteranos lo dicen.

10/04/2012 TAOURIRT MOUCHANNE – EL MAHARCH 35 Km
Vuelta a curase los pies enantes de calzase, y cura tamién del llombu enantes de que Carlos me vende y tiremos pa la salida. Nun hai más qu’echar una güeyada a la xente pa ver que los hai que tan mui mal, y namás que llevamos dos etapes.
Etapa mui dura muscularmente pa min, anque día tres día voi meyorando un poco. Tres 25 km de tou tipu de superficies y pequeños desniveles, pasamos el control 2 y tenemos otra gran llanura. Llevo a otru corredor unos 100 metros per delantre, pero entama una tormenta de sable y pasu ente pasu voi perdiendo la visivilidá. Nin veo al que llevo delantre nin veo denguna marca. Menguo el ritmu y fino caleyando al llevar muncho tiempu sin atopar una marca. La visibilidá nun pue pasar de los 10 metros. y teo que tapame col buff. Cuando aclaria un pocu veo el cañon del fondu pol que tenemos que salir d’esta llanura. Toi desviáu unos 500 metros de la ruta, y como yo munchos más corredores que van apaeciendo ente les nubes de polvu. Entramos nel cañon que mos tien que llevar a un oasis. La temperatura ye mui alta nesi pasu estrechu, ye como si tuviéremos nun fornu. Yo fundome col calor y teo que dexar de correr. fasta pasar el oasis y ver la meta a lo lloñe nun sedré quien a volver a correr, aunque cuando lo faigo garro mui bon ritmu y entro con bona sensación en meta ganando otres dos posiciones na xeneral.
Al descalzame teo males noticies, xunto con dalguna de les angüeñes d’ayeri, apaez un nueva que sí que ye pa esmolecese, salió embaxo una uña y fizo que se llevantara ésta. Teo que pinchala pa saca-y el sangre, pero el dolor que teo ye grande y mañana tenemos la etapa llarga. Mala suerte.
Les vendes que llevo tamién se me movieron, asina que que la rozaura va a más, sina que de nuéu a la enfermería a reponer vendes y gases.
Otru día con tormenta de sable pela tardi. Problemes pa poder cocinar y les condiciones hixéniques que van empiorando. Toos vamos acumulando sucidá nos nuesos cuerpos y nes nueses ropes, y ye que l’agua que mos dan nun da pa más que beber y cocinar.
La xente va a pior, nun se cómo munchos d’ellos y elles saldrán mañana.

11/04/2012 EL MAHARCH – JEBEL EL MRAÏER 81’5 Km
Esta mañana más que nunca hai que curase bien los pies y volver a vendase. La uña tien mui mala pinta , asina que véndola pa intentar que nun se me llevante a lo llargo la etapa.
Güei los 50 primeros de la xeneral saldrán tres hores dempués del restu, asina qu’a les 8:30 salimos los que vamos más atrasaos na clasificación, ente ellos yo que toi el 56. Salgo a un ritmu prudente pa los quilómetros que tenemos per delantre, anque asina y too al poco soi terceru. Y asina llego a les primeres dunes, sigo a los dos primeros igual que munchos otros me siguen a min, y al pocu tamos toos perdíos. Vamos al debalu ensin atopar denguna de les señales, y nun puedo creyer como los dos primeros tiraron p’alantre ensin ver denguna señal. Pasamos duna tres duna fasta ver comu’l resto la carrera avanzamuncho más al oeste. Pierdo unes 30 posiciones cuando retomo la bona ruta xusto nel momuntu d’entamar la subida más llarga de toles de la carrera, subida guapísima ente piedra, y baxada tovía más guapa, con una rampa de sable cuasi vertical que fae que punxeren cuerdes y too. Tirome a lo burro clavando los talones y avanzo munches posiciones enantes de llegar al llanu. Al pocu ta el primer control, yá en terrenu corrible, y al poco, xunto con otros dos corredores, retomo’l tercer puestu. Los dos primeros al nun se perder sáquenmos agora muncho, pero esto ta acabante d’entamar. Per terrenu corrible avanzamos a unos 8 km/h. Pasamos un ríu de piedra en piedra pa nun mos moyar y al poco quedamos yá solo dos nesa tercera posición. Voi mui agusto y pasamos el segundu control, km 24. Y asina seguiré fasta el 30, onde entamen dunes y tamién los mios problemes. Teo que baxar el ritmu y nun sé cómo la xente que me pasa ye capaz de correr onde yo me fundo. Pasen los quilómetros y los controles pero nun salimos de les dunes, la mayoría de la etapa, igual que la mayoría de la carrera ye por superficie blanda, y yo penalizo muncho. Pasamos el km 60, control númberu 5 y la superficie vuelve ser dura. Soi quien a trotar un bon cachu, pero sobre les 7 la tardi nun me queden fuercies nel cuerpu. a lo llargo la etapa comí muncho de lo que tenía pa otros díes intentando engañar esa fame crónica que teo, pero nin asina recargo enerxía. Páxara tremenda mentantu prendo’l frontal y coloco na mochila la señal lluminosa que mos apurrieron nel control 4. De nueche y desfallecíu aporto al últimu control, tovía queden más de 10 km y agora nun pues intentar dir pel suelu más duru, asina que vamos siempres per sable. Más de 2 hores me lleva esi tramu, más de dos hores cola tortura de tar viendo les lluces de meta primero, y la mesma meta dempués anque tovía queden miles de metros pa cruzala. Pierdo munches posiciones, y anímicamente toi derrotáu, namás que pienso en comida, no que nos darán al final de la sesta etapa. Y pa eso falten tres díes.
Dempués de 11 hores y 16 minutos entro en meta. Toi mui mal, pero lo que veo ellí ye increyible. A los pocos metros tiráu en suelu ta unu de los catalanes que nun fae muncho que me pasara. Llora de dolor y dizme qu’enxamás sofriera tanto na so vida. Llevántolu y sofítilu pa llevalu a la H.aima, y pa eso pasamos xunto a una carpa que ponen en meta, ta enllena de xenta tirada, desfallecíos, llorando de dolor, colos pies en carne viva. ¿Merez la pena tantu sufrimientu?
Na h.aima quito la tortura de la mochila, duelme muncho la fería de los reñones. Asina y too lo primero ye cenar, ensin molestar a los portugueses que yá duermen faigo la cena intentando recuperar fuerces y queriendo engañar  la fame. Güei nun teo fuercies nin pa espurrir un poco. Métome na cama colos calcetos puestos porque prefiero nun veme los pies. La xenta va llegando, estrozaos. Al pocu d’echame entama un vendaval pergrande.La h.aima ta medio tirada, pero yo duermo y al abrir un güeyu yá de mañana la tormenta ye tovía mayor.

      

12/04/2012  DÍA DE DESCANSU
La situación ye mui dura, nun podemos salir de los sacos. La tormenta nun para y tenemos sacos, mochiles, h.aima y cuerpos cubiertos de sable. Normal que esto se llame Marathon Des Sables. Pasamos tola mañana asina, ensin posibilidá de movete nin cocinar. Y la xente sigue entrando en meta. A meudía la cosa camuda. La tormenta conviértese en tormenta tradicional y entama a llover a mares. Tenemos goteres. Hai rayos y, anque paeza increible, entama a granizar nel Sah.ara. Y la xente sigue entrando, nun quiero nin pensar no que tarán sofriendo. Fasta primera hora de la tarde nun aporta la calma. selequino tol mundu va saliendo de les h.aimes, vamos sacando les nueses coses pa sacudiles, y lo mesmo facemos cola colcha. Xintamos y volvemos a colocalo too dientro, paez ser que la calma dura.
A les 4 avisu per megafonía, l’últimu de la etapa ta apuntu d’entrar. Salimos a animalu nos metros finales. Ye un chinu de 78 años y menos de metru y mediu, vien a pasu sele, colos dos dromedarios que faen de coche escoba, o dromedariu escoba. Aplausos, aplausos a rabiar, muncha emoción. El paisaní, ensin parar, faenos una reverencia col so menudu cuerpu y entra en meta onde lu espera el direutor de la carrera p’abrazalu.
El campamentu paez un campu batalla, xente coxo, xente vendao per tolos llaos, xente que se sofita nun de los palos de les h.aimes pa poder movese…
El restu tamos tiraos intentando recuperar cuerpu y mente. Ta siendo más duro de lo que creyera diba ser.
Y ente tanta desgracia pasa dalgo que mos anima, la organización reparte a cada participante una Coca-Cola y una barrina enerxética, la mesma que nos diera nel viaxe en bus y que naide comiera polo mal que sabía. Agora pegámosnos por ella, y ye que ya nun se fala más que de comer. Y seya cual seya la nuesa nacionalidá, la mayoría naguamos y suañamos colo mesmu, un platu de pataques frites con un güevu. Nel mio casu más que con un platu con un carretilláu, o un camionáu.

13/04/2012 JEBEL EL MRAÏER – MERDANI 42’2 Km
Esta nueche foi mui fria, y húmeda. Les últimes hores, dende que me llevantara a mexar, nun fui quién a durmime pol fríu. Asina que col primer rayu de sol salgo pa intentar calecer. La cura diaria de pies faeme ver que soi un privilexiáu, si me comparo colos demás. Teo angüeñes, pero nada en comparanza col restu, fasta la uña paez que meyoró d’un día pa otru.
Güei toca maratón, poco si lo compares cola etapa llarga, pero ye un maratón, y los cuerpos tan mui mal. Namás salir toquen dunes, asina que salgo con muncha calma. En pasándoles entamo a recuperar posiciones y eso anímame. Al pocu tenemos que cruzar un riu, y esta vegada ensin piedres, asina que toca moyase y maldecir a la organización por poner esti pasu cuandu falta tanto pa meta colo que eso pue significar pa los nuesos pies. Voi mui bien, meyor que nunca, adelanto y adelanto, y en pasando el segundu control, km 23 dícenme que voi ente los 25 primeros. Pero al poco les caloríes del mio cuerpu dicen basta y entro en barrena, nun me queden fuercies y los últimos 9 km son un calvoriu. Veo la meta al fondu pero voi muertu, pierdo y pierdo posiciones y véngome abaxo. Teo muncha fame, nun piensi notra cosa.
Entro el 93 de la xeneral, y col llombu desfechu. Tanto los compañeros de tienda como periodistes que me vieron recomiéndenme visitar la enfermería, y eso faigo. La cola ye llarga, la mayoría xente necesita asistencia mélica. Cuando me toca la mélica dizme que me tien que quitar les vendes que llevo pa poder llimpiame, y que me va doler muncho. Nun queda otra, ante la güeyada de dolor de los que van tres de min, arráncame les vendes y nun-y gusta lo que ve. Dame un papel pa dir al hospital de campaña. A la puerte l’hospital hai un llavaeru de pies pa los que tienen que curalos. Lo qu’ellí se ve nun se pue describir. Anque lo pior ta cuando me toca entrar y veo como van faciendo les cures a la xente. Na sala del fondo vense les camilles onde tan los que necesiten suero, o los que tienen rotures o esguinces, como Carlos, que con dos esguinces ta siendo vendaú y que llograra finar la carrera.
La cura faeme ser otru, toi doloríu pero nin comparanza cola tortura que yera llevalo too enlleno porquería.
Pela tardi vuelven a llamanos per magafonía, esta vegada avísenmos de que van entrar en meta l’equipu de 10 bomberos franceses qu’arrastren un carru onde lleven a un mozu con parálisis celebral. Na meta hai otros tres mozos cola mesma minusvalía, y tres bomberos adelántense pa garralos en brazos y entrar toos xuntos. Munchos d’ellos nun consiguen aguantar les llágrimes porque, aunque queda mañana, tar equí supón prárcticamente finar la carrera. Aplaudimos, animamos y emocionámosnos con ellos porque nós sabemos tolo que tovieron que sofrir pa pasar con esi mozu per onde toos pasamos.
El día nun da pa muncho más que pa descansar, que ye lo que se fae la mayoría del tiempu y pa seguir curando feríes y pensando en platos de comida. Anque de nuechu la organización prepara dalgo, polo menos subrealista. Un conciertu de música clásica con una orquesta y una soprano vestíos d’etiqueta y veníos dende Francia. La música siempres s’agradez, pero paezme que sedría muncho meyor haber trayío un grupu Bere Ber de la zona.
Dempués del conciertu ponen unes proyeciones de videos de la carrera, pero la temperatura baxa enforma y lo que más presta ye dir pal sacu.

Sables

14/04/2012 MERDANI – MERZOUGA 15’5 Km
Imposible dormir, muncho fríu, más que na nueche anterior. Posición fetal y manes ente’l cuerpu pa nun perder calor, pero nin asina. Pela mañana toos falamos de lo mesmo, y toos pasaron una mala nueche. Y esta mañana’l sol nun calienta. Un vientu fríu azota’l campamentu y nun hai manera calecer. El quedase en manga curtia pa tirar pa la salida ye una tortura y tamos toos y toes muertos de fríu.
La mochila pesa muncho menos y eso agradezse, asina que saldré fuerte los primeros 6’5 km que son corribles porque los siguientes son de dunes. Últimu día, AC/DC, últimos saludos y salimos. El plan vase polos suelos. El mio cuerpu nun tien nin caloríes pa calentase como pa pedir que corra rápido. Voi mal y pierdo munches posiciones, teo muncha fame, más que fame hambruna. Nun consigo calecer fasta pasar el control, xusto cuando entamen les dunes, y entós faese’l milagru, nun se d’ónde, pero apaecen les fuerces y faigo lo que nunca pude facer, correr peles dunes. Y non per unes dunes cualesquiera, les de güei son les mayores dunes de Marruecos. Entamo a adelantar y nun paro, voi crecidísimu, como si me fueren quitar la bolsa con comida de meta. Soi capaz de subir corriendo toles dunes y adelanti decenes de puesto. Voi tan bien que cuando veo la meta preferiría que, por una vegada, toviera muncho más allá.
Entro en meta. Acabose esta tortura. Llevanto los brazos porque anque nun cumplí les mios perspeutives, llegar equí ye un triunfu, y se que anque me tocó sofrir, nun ye comparable al nivel de sofrimiento d’otros. Poques carreres como ésta habrá onde los sentimientos seyan tan enfrentaos, o l’ames o la odies, y yo necesito tiempu pa decidime.
En meta medalla y abrazu de Patric, quitar el chip y… La bolsa comida!!, tira pal bus y ellí esfruto con lo escaso que trae esa bolsa pero que llega a emocioname pola necesidá tan grande que tenía de meter dalgo diferente pal cuerpu.
Y si nun yera poco lo pasao, tovía mos queden unes 5 hores de bus fasta llegar al hotel d’Ouarzazate, onde mos aspera otru momentu gloriosu, la ducha. Tres una selmana ensin llavase ye un placer enxabonase una y otra vegada fasta quitase tola mierda acumulada y poder vestise con ropa llimpio. Y entós sí, entós llega el momentu estelar, baxar al comedor a cenar y atopase con un bufet impresionante. Tirámosnos a ello como si lleváremos díes ensin probar bocáu. Y non solo yo, toos comemos con ansidá y repetimos platos y platos fasta que nun podemos más. Hai que recuperar tolo perdio, que nel mio casu foi un 10% de la masa corporal.

Y pal final dexo lo meyor, la emoción de recibir tolos mensaxes de sofitu que día tres día dibeis mandando y que la organización mos apurría cada tarde. GRACIES, MUNCHES GRACIES POL ANIMU.
Y un recuerdu tamién pa los compañeros de h.aima. Carlos, col que compartí penes y dalguna allegría, sofrimientos y confidencies, y que aspero atopara les rempuestes que diba buscando. a Carlos de Sa, grandisimu corredor portugues, gran profesional y sufridor en silenciu, persona prudente y gran compañeru. Susana y Telmo, grandes corredores y grandes persones, pola “molta fome” que pasamos xuntos y por “a nosa bandeira portuguesa” que llevaben a tolo llaos. A Miguel, por increiblemente poder disfrutar d’esta carrera y tresmitimos esa sensación. Y a Pedro, el más veteranu y de los que más sofrió, pero que mos demostró lo que ye superase.
Dende les dunes marroquís, PUXA ASTURIES!!

                  

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s