Helly Hansen Avientu

Viaxar a Groenlandia ye toa una aventura. A vista d’avión, impresiona ver cientos y cientos de quilómetros de xelu. La inmensidá xelada que crucemos d’este a oeste de la isla, y que fina nun estrechu trozu tierra alrodiu los fiordos. Nun d’esos fiordos, a 170 Kms tierra dientru, ta’l nuesu destín.Aterrizar nel aeropuertu de Kargerlussuaq ye tar nel cientru’l pueblu, y tamién tar yá nel hotel, yá que los dos comparten edificiu. La primera impresión ye de fríu, munchu fríu, -15º C y eso que fae sol. Polo que mos contaría díes dempués un Inuit del llugar (indos esquimales), esti añu l’iviernu vien adelantáu, y a estes altures too ta yá cubierto por una capa de ñeve, y fasta’l fiordu atópase xeláu.El día enantes del maratón la organización llevamos a conocer el recorríu. Montaos en camiones-autobuses too terrenu, necesitamos el sofitu d’un quitañeves p’aportar al llímite de la capa de xelu. Dende ellí, la única posibilidá ye caminar 3 kms que correremos penriba del xelu mesmu. Ye muncha la ñeve que mos aspera a lo llargo d’un recorríu rompepiernes, lo que lo fadrá más duro qu’otros años anteriores.A la fin tamos nel día de la carrera. Ye de nueche cuando montamos nos camiones-bus que mos llevarán fasta la salida. Tardamos más d’una hora en facelo. Vamos viendo salir el sol mentantu fuera, a -15º C a esa hora, sedrá difícil facelo. La salida ta en metada de la nada. Unes 70 persones nun paramos de movenos pa nun perder calor, cuandu de sópitu llevanten dos palos con una pancarta que pon “start”. Toos entamamos la cuenta atrás en inglés fasta que nel ceru un inuit dispara un fusil de caza. Salimos corriendo per una ruta qu’adentra pa la fastera de los xelos eternos. Los primeros kms son de subida continua onde ponemos a preba los spiky plus que llevamos.A los pocos metros yá corro solu, cosa que fadré comu la mayoría, el resto’l maratón. A la entrada del xelu soi terceru, esos kms son los más duros yá que enterrámosnos unos 30 cms. na ñeve. La sensación de correr sobre un glaciar ye única, equí la temperatura baxa a -20º C, pero la soledá y el silenciu de la inmensidá blanca paga la pena. Al salir del glaciar ta’l primer avitalluamientu, ellí y n’otros, podremos dexar ropa o poner otra o calzáu que dimos na salida a la organización. L’avituallamientu pue ser caliente o fríu, nesti primeru garro agua caliente, pero’l nun tar avezáu a ello fae que nos siguientes prefiera’l fríu, que se xela a los pocos segundos de que te lo dan.Avanzamos pa contra Kangerlussuaq per una pista cubierta de blancu que camuda de nivel ca pocu. Anque voi solu pueo ver delles vegaes a los primeros clasificaos, lo que me confirma que-yos voi recortando terrenu. Pero la mio carrera finará nel km 19, una lesión de rodiella qu’arrastro diz basta, y dende entonces entamará un infiernu pa mín. Paso la media 3º pero a un ritmu mui baxu, y dende entos nun pararán d’adelantame otros corredores. Falten munchos kms y el cuerpu, y sobre too les manes, entamen a xelase. Situación qu’empeora los minutos que nun soi quien a correr por mor del dolor. Nun quito l’abandonu de la mio tiesta, pero voi pasando avituallamientos y nel km 35 recupero dalgo’l ritmu.A la fin entro na meta nel puestu 18, con cuasi 5 hores de sufrimientu que nun me dexen mover les manes nin la cara por mor del fríu. Frustración en meta pola oportunidá perdía, anque menguada en parte por haber finao la carrera.

Y al día siguiente algo más de fríu, llegaríemos a tar a -25 º C pero esta esperiencia polar, con aurora boreal incluyía, pagaría la pena.

Dende’l xelu eternu, ¡PUXA ASTURIES!

Tus compañeros de equipo te dan la ENHORABUENA

Fotos