Sus palabras hablan por sí solas…
Crónica por: Fernando Gonzalez.
“Saharamarathon 2010, l’aventura africana A entamos del añu pasáu marqueme’l retu personal de facer el Gran Slam de maratón, que nun ye más que correr un maratón, o carrera de más quilómetros, en cada unu de los siete continentes y Polu Norte (América cuenta por dos, norte y sur). Dempués de tener más que cubierto Europa, la segunda etapa llevome a Groenlandia (América del Norte) pa correr el Polar Circle Marathon, y como dempués de dos siempres hai tres, ésta sedría n’Africa, nel Saharamarathon. Esti añu sedríemos más de 800 corredores de 28 nacionalidaes los que correríemos pel desiertu arxelín en dalguna de les 4 carreres organizaes, maratón, media, 10.000 y 5.000. Dos aviones saldríemos dende Madrí y otru dende Italia, camín de Tinduf, Arxelia. A min tocaríame’l segundu de los vuelos, y el viaxe pue definise de too menos tranquilu. El primer incidente tendrelu nel vuelu Asturies-Madrí, dempues d’aterrizar, y cuando mos averamos a la terminal, un ala del avión pega con una escalera movil, que nun taba onde tenía que tar. Anque’l golpe ye grande la pior parada ye la escalera, y tamien nós, que tenemos qu’asperar más de media hora nel avión enantes de poder posamos. La salida de les maletes tamién se retrasa pol incidente, y anque voi con tiempu llego polos pelos a la cita que tenemos na fastera de salides del aeropuertu. Con más d’una hora de retrasu salimos pa Tinduf, previa escala teúnica en Arxel, escala que tamién daría de si, ya que por mor d’un aterrazaxe más que violentu, l’avión nun pue continuar vuelu, y tenemos que facer tresbordu pa otru. Más retrasu. Y a la fin sobre les 4 la madrugada aterrizamos nel aeropuertu militar de Tinduf con cares de cansanciu. Cargamos toles maletes en camiones, y nós facemos lo mesmo n’autobuses de los años ochenta. Tomamos camín d’Asmara, el campu de refuxiáos sah.arauis nel que pasaremos los primeros díes. A los pocos quilómetros tamos siendo yá escoltaos por tooterrenos del Frente Polisariu que mos acompañarán siempres en tolos desplazamientos. Y tres pasar dellos controles de militares arxelinos y polisarios, aportamos al ayuntamientu d’Asmara a les 5:30. El campamentu nun tien allumbráu, asina qu’a escures vamos acompañaos por dos muyeres de la h.aima que mos toca. Los mios compañeros na casa d’adobe sedrán Tatiana, una moza d’Iruña que vien a correr la media, y Ricardo, el Chino, trialeta de Cuellar al que yá conozo y que correrá la marathón. La mañana del sábadu damos tiempu a conocer a la famila que mos acueye, a Coria, la muyer, al so maridu, y a los sos cinco fíos y fíes que mos traten comu si fuéremos unu más d’ellos, y que mos amuesen tola so hospitalidá, n’especial Mohamed, de 12 años que fala castellán y sedrá pa nós el nuesu intérprete, igual que Darchalha, hermana de Coria, sedrá la nuesa guía nel campamentu. Sábadu y domingu sirven pa facer delles visites y conocer la dura rialidá na que viven dende fae 35 años tolos habitantes de los campamentos de refuxiáos. Na metada del desiertu, ensin dengún recursu, viven de la ONU y de l’ayuda humanitaria. Y yá ye llunes, día de la carrera. A les 5:30 en pie, a les 6:00 almuerzu, y ales 6:30 bus que mos llavará a la salida, nel campamentu de ElAyoun. La salida ta prvista pa les 9:30, pero los actos previos allarguense, y saldremos cuasi a les 10:00, ente os glayíos de cientos de muyeres y neños. A los pocos metros soi quintu, pero la salida allocada d’unu de los arxelinos fae que los primeros corredores mos confundamos de camín, la tensión ye alta, sobre too nos dos primeros. La xente mándamos p’allá y p’aca, y yo nun paro de meter esprines pa nun perder de vista al que llevo delantre y quedame tiráu. Esto faemos desgastar muncho, y nun sedrá fasta qu’aporte un coche de la organización, cuando atopemos el bon camín. Resultes qu’adelantemos unos metros sobre los que nun se perdieron, asina qu’a nós neutralícenmos fasta que mos adelanta la verdadera cabeza de carrera. Asina y too yo voi solu dende la salida, y solu correré tola carrera, ya que nun soi capaz de siguir el ritmu de los que llevo delantre. Soi sétimu cuandu oigo un ruíu estrañu, tuerzo la tiesta pa ver como m’adelanta unu de los camellos con xinete que participó na ceremonia de salida. Esto solo pasa n’África. Al poco adelanto a un sah.araui que salió mui aceleráu y ta pagándolo yá. Soi sestu. Hai avituallamientos cada dos o tres quilómetros, y anque les botelles d’agua al sol nun presten pa beber, hai que facelo pa nun desidratar nestos 42 quilómetros ensin una sola solombra. Y suerte que güei nun apreta muncho’l sol, ya que taremos ente 25 y 28 graos. Poco enantes de la media pásame otru corredor, anque esto poco importa cuando pasamos pel campamentu d’Aoserd. Increyible, cientos y cientos de neños y muyeres salen al nuesu pasu con banderes sah.auis y glayíos de sofitu. Increyible, nun hai otra pallabra, nun habrá corredor nin corredora que nun s’emocione a pasar pente esta xente. Tres pasar la media entamen les dunes y los bancos de sable que faen qu’esta parte seya muncho más dura y que delles vegaes mos quedemos cuasique clavaos. Adelanto a unu de los arxelinos que va mui mal y entamo a adelantar a munchos de los que corren la media y que salieron d’Aosred. Noto que baxo’l ritmu, y ye desespérome un poco ca vegada qu’aporto al altu una duna y nun acolumbro’l campamentu dAsmara. Pero nel trentaypicu veo al nixerianu que diba en cabeza caminando y desfallecíu dafechu, soi quintu y eso anima enforma a dalguien que como yo nun ta avezáu a correr en puestos d’alantre. Subo’l ritmu y camiento qu’igual rompe dalgunu más de los de cabeza, pero eso nun pasa, y una vez ya dientru d´Asmara, y a falta de dos quilómetros pa meta, soi yo’l que desfallez. Otra vegada cientos de neños y muyeres mos animen, pero eso nun ye quien pa que 500 metros dempués un italianu m’adelante. Soi incapaz de siguilu, y entro en meta sestu con tres hores trece minutos. Contentu, mui contentu. Emocionáu, mui emocionáu pola vivencia y pol sofitu de tola xente. Y dende entos pasaríame dos hores pa poder recuperame de la insolación y la hipoglucemia que les médiques de la carrera dicen que teo. Anque nun ye grave vomitaría un par de veces enantes de recuperar glucasa y color. El maratón ye duru, nun ye facil correr pel desiertu nestes condiciones tan estremaes al iviernu asturianu, pero pago la pena. Al día siguiente entrega de premios, onde’l ganador sedría’l vascu Jon Salvador con record incluyíu, 2:42. Y tres una tarde de más visites el miércoles camudaríemos toos de campamentu pa dir fasta Dahla nun viaxe agotador, pero que pagaría la pena polo guapo del llugar, poles sos dunes, la so xente, los sos amaneceres dende l’altu una duna, les sos puestes de sol, el so cielu enllenu d’estrelles a reventar. Y onde tamién compartiría h.aima con otru asturianu, Peri, que lleva más de 40 años pel caribe, y que mos pondría los dientes llargos con hestories de Bonaire, la isla paradisica onde vive. Y el xueves tendría la oportunidá de participar nun partíu de fubol ente la selleición sah.araui y un convináu del restu’l mundu, onde conpartiré equipu col fubolista Iván Helguera, que participó na media. Por cierto, ganamos nos penaltis. Pela tarde carrera de neños, más de milenta correrán descalzos mentantu agora somos nós los que-yos devolvemos los aplausos. Ye vienres y toca tornar pa casa, güei llegaremos a los 42 graos de temperatura, y asina y too habrá desfile pola cellebración del día nacional de Sah.ara. Y a los buses, y a los aviones, y de vuelta a casa cola sensación de tener vivío una esperiencia con mayúscules. Habrá carreres muncho meyor organizáes, habrales muncho más guapes, más dures o con más nivel, pero nun atoparéis denguna como esta, asina que dende equí quiero animavos pa que nos prósimos años participéis y viváis lo que too esto significa. Por ciertu, gracies a tola xente que corrimos, esti añu nel campamentu de Dahla tienen un centru deportivu nuevu, y el añu qu’entra habrá otru proyeutu. Dende’l desiertu infinitu, Puxa Asturies, y como non, Puxa’l sah.ara. P.D. prósima etapa: 100 myes del Himalaya.”
Enlace: www.saharamarathon.org/
Video: http://www.rtve.es/mediateca/videos/20100225/21-kilometros-solidaridad-sahara/704321.shtml
